April 2012
No er det avklart, den neste filmfestivalen i Os vert 21. til 28. april 2012!
Våre visjonar
- Eit solid filmprogram som blandar det høgkommerse, det obskure og det kystkulturelle
- Ein filmfestival som går utover kinosalen – ein folkefest i heile Osbygda
- Ein arnestad for dei beste, unge talenta
- Framleis skapa ein god møtestad for bransjen – staden der alle vil kome, der dei kjenner seg heime og idear vert fødd
- Store satsingar, stunt og happenings, festar og arrangement som feirar filmen og brukar bygdenoreg og kysten som bakteppe
60°N foreiner fjord- og filmkultur når det skipast til filmfestival i Os. Den går nemleg av stabelen bokstaveleg tala i fjordkanten, inne i det flunkande nye kunst- og kulturhuset Oseana. Men dette er ikkje festivalen som stenger vårsola ute – festivalen skal i aller høgste grad virke også utanfor kinosalen. Med seminar for bransje, filmfestar, filmquiz, barnefilmfest, galla og prisutdeling, og mykje, mykje meir, vil 60°N gjere Os om til eit Cannes, eller kanskje Berlin, i miniatyr.
60°N har røter tilbake den vidgjetne WT-festivalen, som etter ti år med rykte som den mest sjarmerande filmfestivalen i Noreg sette Os på filmkartet. Men med eit heilt nytt og moderne kulturutrykk i Os trong også filmfestivalen å fornya og modernisera seg. Difor er det med ny profil, nytt uttrykk og nytt tidspunkt at den internasjonale filmfestivalen i Os gjenoppstår. Arven vi tek med oss er den unike sjarmen og eksentriske eigenarten, glamour og folkelegheit hand i hand, og erfaringa om at ordet festival i sanning byrjer med fest.
Vår målsetjing er at Os framleis skal vere staden for den mest sjarmerande filmfestivalen i landet, samstundes som vi fornyar både uttrykk og omgjevnader. Velkomen til Os 21. til 28. april 2012!
English
Nynorsk